جعلی اکاونٹس کیس : آصف زرداری کے جسمانی ریمانڈ میں 11 روز کی توسیع

اسلام آباد: احتساب عدالت نے سابق صدر آصف علی زرداری کے جسمانی ریمانڈ میں 11 روز کی توسیع کرتے ہوئے انہیں 2 جولائی کو دوبارہ پیش کرنے کا حکم کردیا۔
تفصیلات کے نیب نے جعلی اکاونٹس کیس میں گرفتار پیپلزپارٹی کے شریک چیئرمین آصف علی زرداری کو احتساب عدالت اسلام آباد میں پیش کیا ۔ جج محمد ارشد ملک نے کیس کی سماعت کی۔ نیب نے آصف زرداری سے اب تک ہونے والی تفتیش کی پیش رفت رپورٹ عدالت میں پیش کرتے ہوئے ان کے جسمانی ریمانڈ کی درخواست کی۔آصف زرداری نیب پراسیکوٹر کے دلائل کے دوران روسٹرم پر آگئے جس پر جج نے ان سے استفسار کیا، کیا آپ دلائل سننا چاہتے ہیں تو آصف زرداری کے وکیل لطیف کھوسہ نے کہا کہ یہ سننا چاہ رہے ہیں نیب کیا گھڑ رہی ہے جس پر نیب پراسیکوٹر سردار مظفر نے جواب دیا کہ ہم گھڑ نہیں رہے بلکہ تفتیش کے ذریعے بتا رہے ہیں۔
آصف زرداری نے کہا کہ میرا ایک ہی دفعہ 90 روز کا ریمانڈ کر دیں تاہم احتساب عدالت نے آصف زرداری کے ریمانڈ میں 11 روز کی توسیع کرتے ہوئے انہیں 2 جولائی کو دوبارہ پیش کرنے کا حکم کردیا۔