لاپتا طیارہ شاید خلائی مخلوق نے اغوا کیا، بھارتی میڈیا کا دعویٰ

ممبئی: ویسے تو بھارتی میڈیا صحافت کے نام پر کلنک ہے ہی، لیکن کبھی کبھار ایسی بیوقوفانہ بات کرجاتا ہے جو پوری دنیا میں بھارت کیلئے جگ ہنسائی کا باعث بن جاتی ہے۔

ایک ہفتہ پہلے آسام کے جورہاٹ ائیر بیس سے اروناچل پردیش کے مینچکا کیلئے اڑان بھرنے والے ہندوستانی فضائیہ کے طیارہ آئی اے ایف اے این 32 کے لاپتہ ہونے کی خبر آئی۔ اس طیارے میں تقریبا 13 افراد سوار تھے۔ طیارے کا گراؤنڈ اسٹاف سے آخری مرتبہ تقریبا ایک بجے رابطہ ہوا۔ اس کے بعد آج تک اس کا پتا نہ چل سکا۔

ہندوستانی فضائیہ نے اے این 32 طیارے کا پتہ لگانے کیلئے ایک سکھوئی 30 جنگی طیارہ اور سی 130 اسپیشل آپس طیاروں کو بھیجا۔ لیکن کچھ بھی سود مند ثابت نہ ہوسکا اور طیارہ تاحال لاپتا ہے۔

طیارے کی گمشدگی پر مختلف قیاس آرائیاں جاری ہیں، تاہم بھارتی میڈیا کے ایک چینل نے غیرذمہ داری کی انتہا کرتے ہوئے اسے خلائی مخلوق کا کارنامہ قرار دے دیا ہے۔

بھارتی میڈیا رپورٹ میں دعویٰ کیا گیا ہے کہ شاید یہ گمشدہ طیارہ ایلینز نے اغوا کرلیا ہے۔