‘بی آرٹی کی تکمیل کی تاریخ نہ پوچھیں، یہ تو آپ ستارے مانگ رہے ہیں’

بی آر ٹی سے متعلق پشاور ہائیکورٹ میں کیس میں دوران سماعت جسٹس قیصر رشید نے ریمارکس دیے کہ بی آرٹی کی تکمیل کی تاریخ کے بارے میں نہ پوچھیں، یہ تو آپ ستارے مانگ رہے ہیں۔

پشاور میں زیر تعمیر بی آرٹی منصوبہ کی زد میں آنے والے زیر زمین دکانوں سے متعلق کیس کی سماعت جسٹس قیصررشید اورجسٹس عبدالشکور نے کی۔

ہائیکورٹ میں اپیل مہمند کنسٹرکشن کمپنی نے دائر کی ہے۔

درخواست گزار نے عدالت کو بتایا کہ بی آر ٹی کی زد میں 47 دکانیں آئیں، اب دوبارہ اتنی تعداد میں دکانیں نہیں دی جارہیں جبکہ توڑی گئی دکانوں کی ادائیگی بھی اب تک نہیں کی گئی۔

وکیل درخواست گزار نے کہا کہ بی آر ٹی کی مکمل ہونے کی تاریخ بھی نہیں بتائی جارہی۔جس پر جسٹس قیصر رشید نے ریمارکس دیے کہ آپ ستارے مانگ رہے ہیں۔بی آر ٹی کی مکمل ہونے کی تاریخ نہ مانگیں۔

کیس میں پی ڈی اے کی جانب سے جواب جمع کرانے میں سماعت ملتوی کردئی گئی۔