چین میں لیکیما کی تباہی: تیرہ ہلاک، سولہ لاپتہ

مشرقی چینی صوبے زی جیانگ میں سمندری طوفان لیکیما کے ساتھ آنے والی موسلا دھار بارشوں اور زوردار جھکڑوں کی وجہ سے مٹی کے تودے گرنے کے ایک واقعے میں کم از کم تیرہ افراد ہلاک ہوئے ہیں۔ مقامی انتظامی اہلکاروں نے سولہ افراد کے ملبے تلے دبے ہونے کا بھی بتایا ہے۔ ریسیکو کارکن ان کی تلاش جاری رکھے ہوئے ہیں۔ مٹی کے تودے کے گرنے کا یہ واقعہ وین ژُو کی مقام پر ہوا اور اس باعث ایک بہتے ہوئے دریا کے بہاؤ کو بھی روک دیا ہے۔ ابھی تک مختلف مقامات سے جانی و مالی نقصانات کی حتمی تفصیل میسر نہیں ہو سکی ہے۔ بے شمار مکانوں کی چھتیں اڑ گئی ہیں۔ بجلی کا نظام درہم برہم ہے۔