لبنان میں مظاہروں کی شدت، وزیراعظم الحریری مستعفی

لبنان کے وزیراعظم سعد الحریری نے حکومت مخالف مظاہروں کے باعث اپنے منصب سے استعفیٰ دے دیا ہے۔ انہوں نے یہ استعفیٰ گزشتہ روز صدر کو پیش کیا اور اس کا اعلان ٹیلی وژن پر ایک تقریر میں کیا۔ بیروت سمیت دوسرے کئی شہروں کے مظاہرین نے وزیراعظم کے استعفے پر خوشی کا اظہار کیا۔ لبنان میں سترہ اکتوبر سے مسلسل مظاہرے جاری ہیں۔ صدر نے ابھی کسی اور سیاستدان کو حکومت تشکیل دینے کی دعوت نہیں دی۔ مظاہرین کرپشن کے انسداد اور اقربا پروری میں تسلسل کے خاتمے جیسے مطالبات رکھتے ہیں۔ وزیراعظم کے مستعفی ہونے کے بعد آج بدھ کے روز فوج نے مظاہرین کو رکاوٹیں ہٹانے کی ہدایت کی ہے۔