شامی حکومت اور اپوزیشن کے براہ راست مذاکرات

شورش زدہ ملک شام کی حکومت اور اس کے مخالفین کے درمیان ساڑھے آٹھ برسوں بعد پہلی مرتبہ براہ راست ملاقات آج بدھ کو سوئٹزرلینڈ کے شہر جنیوا میں ہو رہی ہے۔ یہ شام کے لیے نئے دستور کو مرتب کرنے والی کمیٹی کا اجلاس ہے اور اس کا انعقاد اقوام متحدہ کی مسلسل رابطہ کاری اور کوششوں کا نتبیجہ ہے۔ اس دستور سازی کمیٹی کے اجلاس میں 150 مندوبین شریک ہو رہے ہیں جن میں سے پچاس کا تعلق حکومت، پچاس کا اپوزیشن اور پچاس ارکان سول سوسائٹی کی نمائندگی کر رہے ہیں۔ اس خصوصی کمیٹی کو روس، ایران اور ترکی کی حمایت حاصل ہے۔ اس موقع پر ایرانی وزیر خارجہ نے کہا ہے کہ اجلاس کے حامی تینوں ممالک دستور ساز کمیٹی کے اجلاس کا حصہ نہیں بنیں گے۔