اسرائیلی اور فلسطینی حکام کے درمیان اعلیٰ سطحی ملاقاتوں کے بعد تل ابیب حکومت نے فلسطینی اتھارٹی کے لیے ڈیڑھ سو ملین ڈالر قرض کا اعلان کیا ہے۔ اسرائیلی وزارت دفاع کے ایک بیان میں بتایا گیا کہ وزیر دفاع بینی گینٹس اور فلسطینی صدر محمود عباس نے اتوار کی رات ہونے والی ملاقات میں مغربی کنارے کے مقبوضہ فلسطینی علاقے میں اقتصادی تعمیرِ نو کے حوالے سے تبادلہ خیال کیا۔ بینی گینٹس نے ویسٹ بینک کے حالات میں بہتری کے لیے قرض کا اعلان اس بات چیت کے بعد کیا۔ گینٹس نے ملکی میڈیا کو بتایا کہ یہ فیصلہ اسرائیلی مفادات کے پیش نظر کیا گیا ہے۔ گینٹس کے بقول انہوں نے صدر عباس سے کہا کہ فلسطینی اتھارٹی جتنی مضبوط ہو گی، حماس اتنی ہی کمزور ہوتی جائے گی۔ غزہ پٹی کے فلسطینی علاقے پر حماس کا کنٹرول ہے اور اسرائیل حماس کو ایک دہشت گرد تنظیم قرار دیتا ہے۔
Comments
Post a Comment